ILOILO CITY – All eyes sa subong sa estado sang Nevada ang bilog nga pungsod sang Estados Unidos bangud tuman ka lapit ang race sa tunga nanday incumbent Democratic Sen. Catherine Cortez Masto kag Republican challenger Adam Laxalt.
Sa subong, balanse na ang control sa Senado.
Sa na-count na nga 95% sang balota, nagapanguna si Laxalt sa margin nga 0.1%.
Sa nabilin nga uncounted ballots, ang kampo ni Cortez Masto ang nagalaum sa gihapon nga madaog ang race.
Ang Senate race sa Silver State ang maka-decide sa kun ano nga partido ang maga-kontrol sang upper chamber sang Kongreso.
Sa tion nga magdaog si Cortez Masto, ang Democrats ang makakuha sang majority sang Senate bangud sang mangin tie-breaking vote ni Vice President Kamala Harris.
Sa tion naman nga magdaog si Laxalt, ang kapalaran sang Democrats ang magadepende sa Georgia kun sa diin, sanday Democratic incumbent Sen. Raphael Warnock kag Republican Herschel Walker ang maga-face off sa December run-off election.
