ILOILO CITY – Gindagdagan sang sanction sang Estados Unidos ang morality police sang Iran kag gin-akusaran ini sang pagpang-abuso batuk sa mga kababainhan kag ginbasol sa kamatayon sang 22 anyos nga si Mahsa Amini nga napatay sang gin-kustodiya.
Nag-umpisa ang kaakig sang mga tawo bangud sa natabo kay Amini nga gin-aresto sang morality police sa Tehran bangud sa ginapahayag pagsuksok sang improper hijab sang nagligad nga semana.
Ang pulis nga nagdakop kay Amini amo ang dedicated unit nga nagapatuman sang istrikto nga dress codes para sa mga babayi, kaangay sang pagsuksuk sang compulsory headscarf.
Kasunod sang pag-aresto sa dalaga, ginpahayag sang otoridad nga na-stroke ini kag na-heart attack rason nga sang gindala sa ospital, napatay ini pagkasunod nga mga inadlaw.
Ginpahayag naman sang pamilya nga indi matuod nga may iban nga balatian si Amini.
Ginpanginwala man nga ginlapas sini ang mandatory modest-dress rules sa pungsod.
Ang ginapatihan sang mga tawo amo nga ginsakit ini sang mga pulis.
Diri nag-umpisa ang kaakig sang publiko, naglapta ang protesters, kag nagbato pa sa security forces.
May mga babayi man nga nagauba sang ila hijab kag nagasunog sini, kag may iban man nga nagagunting sa ila buhok.
Isa ini ka gamhanan nga akto sang paglapas sa pagsulundan sa ila nga lugar kun sa diin required gid ang mga babayi nga magsuksok sang hijab ukon headscarves.
Gin-akusaran sang United States Treasury ang morality police nga naglapas sang kinamatarong sang mga protesters kag ginkumpirmar nga magahatag ini sang sanctions sa pito ka senior Iranian military kag security officials lakip na ang pinuno sang ground forces sang Iranian army.
Nagpanawagan si Treasury Secretary Janet Yellen sa gobyerno sang Iran nga untatan na ang pagpang-abuso sa mga kababainhan kag ang nagapadayon nga violent crackdown sa mga protesters.
Bangud sang sanction, ang tanan nga propyedad kag interests sa propyedad sang mga designates nga yara sa idalom sang jurisdiction sang Estados Unidos ang gin-block kag dapat nga i-report sa Office of Foreign Assets Control sang Treasury.
