ILOILO CITY- Indi na mamag-o pa sa iya katungdanan ang Acting Regional Director sang Police Regional Office 6 nga si Police Brigadier General Archival Macala.
Sa interview sang Bombo Radyo kay Macala, iya ginpahayag nga sa sulod sang 17 ka bulan nga nagpungko ini bilang Deputy Regional Director for Administration sa Region 6, nangin pamilyar na ini sa sitwasyon kag kultura sang mga Ilonggo.
Suno sa acting regional director, bentaha man para sa iya nga nakapangasawa ini sang isa ka Ilonggo nga taga-Janiuay,Iloilo.
Apang sa pihak sini, nagahingyo sa gihapon si Macala sang kooperasyon sang mga pumuluyo agud mangin madinalag-on ang iya liderato.
Si Macala ang tumandok sang Lipa City, Batangas kag na-assign naman sadto sa Camp Crame kag bilang Provincial Director sang Misamis Occidental Police Provincial Office.
Si Macala nga graduate sang Philippine National Police Academy- class of 1991 amo ang nagbulos kay Police Brigadier General Leo Francisco nga gin-assign na bilang Chief Directorate for Operations sa Camp Crame.
