Nag-abot sa Taiwan ang grupo sang lawmakers halin sa Estados Unidos kag sa France.
Wala gin-anunsyo sang Estados Unidos ang pagpadala sini sang walo ka lawmakers nga ginpanganuhan ni Stephanie Murphy, isa ka Democrat halin sa Florida nga nagapungko sa House Armed Services Committee.
Magatinir ang delegasyon sang Amerika tubtub sa Byernes.
Suno sa foreign ministry sang Taiwan, magapakigkita sila kay President Tsai Ing-wen samtang yara sila sa isla.
Magluwas sa US lawmakers, may lima man ka French lawmakers nga nag-abot sa Taipei nga amo ang first high-level European delegation halin sang nag-ibwal ang kaakig sang China bangud sa pagbisita ni US House Speaker Nancy Pelosi sang nagligad nga bulan.
Sa kaakig sang China, nagpadala ini sang warships, missiles, kag fighter jets sa palibot sang Taiwan bilang pagpakita sang pagpamatok sang presensya ni Pelosi. Ang ginhimo sang China ang ginakabig pinaka-agresibo sini nga exercises halin sang mid-1990s.
