ILOILO CITY – Napati si Iloilo Governor Arthur Defensor Jr., nga indi pa kinahanglan nga magpatuman sang lockdown sa probinsya sang Iloilo nga ginaduso sang mga alkalde sa pihak sang pagsaka sang kaso sang Coronavirus Disease 2019 sa Pilipinas nga naglab-ot na sa 64.
Sa interview sang Bombo Radyo kay Governor Defensor, iya ginpahayag nga madamo pa sang nagakadapat nga ikonsidera antes makapatuman sang lockdown sa isa ka lugar.
Suno kay Defensor, kinahanglan pa nga tsekyaron kun bala handa ang probinsya sa mangin epekto sang pagpatuman sang lockdown ilabi na sa mangin epekto sini sa mga pumuluyo.
Nagpasalig ang natungdan nga ginatinghuaan gid nila nga ma protektahan ang bilog nga probinsya batok sa pagpamahog sang makamamatay nga virus.
Padayon naman ang pagpanugyan sang gobernador sa mga pumuluyo nga indi mag panic kag sundon lang ang mga pagsulundan nga ginhatag sang gobyerno agud malikawan nga matapikan kag maglapta pa ang nasambit nga balatian.
