ILOILO CITY- Napun-an sang emosyon ang liwat nga pagpatigayon sang hearing sang committee on Disaster Relief sa Iloilo City Council kaangot sa natabo nga Iloilo Strait tragedy nga ginkamatay sang 31 ka tawo.
Ang hearing ang gintambungan sang mga tiglawas sang Philippine Coast Guard, Maritime Industry Authority, City Disaster Risk Reduction and Management Office kag mga survivors.
Sa nasambit nga hearing, wala napunggan sang isa sa mga survivors nga sukmaan kag basulon ang Philippine Coast Guard kun ngaa madamo ang nagkalamatay.
Suno sa survivor nga si Rexie Lorilla sang Lambunao, wala sang nagakaigo nga apparatus ang mga katapo sang Philippine Coast Guard nga nag-rescue sa ila kag kaangay nga indi man ang mga ini makahibalo sang ila himuon rason nga apat sa iya kaupdanan nga manunudlo ang nagkalamatay.
Nagdepensa naman si Commodore Allan Victor Dela Vega, commander sang Philippine Coast Guard Western Visayas,sa akusasyon sang mga survivors nga ang iban sa ila ang nagapangkuha sang mga letrato.
Suno kay Dela Vega, indi lang rescue operation ang trabaho sang Philippine Coast Guard kundi ang pag-dokumento sang ila mga operasyon.
Samtang, suno naman kay Councilor Love-love Baronda, chairman sang committee on Disaster Relief sa Iloilo City Council, iya ginpahayag nga nakit-an sa ginpatigayon nga hearing nga kulang ang pyscho-social support nga ginhatag sa mga biktima.
Magluwas diri, ila man nakit-an nga kinahanglan gid nga pasangkaron pa ang capacity-building sa mga natungdan nga ahensya sang gobyerno.
Ginpahayag naman ni Baronda nga liwat nila nga pungkuan sa konseho ang nasambit nga butang agud makahimo sang mga rekomendasyon.
