ILOILO CITY – Magasugod na bwas nga adlaw, Marso 14 ang imbestigasyon sang House of Representatives may kaangtanan sa makaduluda nga pag-absent sang lima ka mga police escorts ni Negros Oriental Governor Roel Degamo sa adlaw nga ginpatay ini.
Ini ang ginkumpirma ni Sta. Rosa City lone district Rep. Dan Fernandez.
Si Fernandez ang chair sang Committee on Public Order and Safety, nga amo ang magapatigayon sang motu proprio inquiry.
Lakip sa mga imbitaran amo sanday Department of the Interior and Local Government Secretary Benhur Abalos, si Department of Justice Secretary Boying Remulla, si Philippine National Police Chief Rodolfo Azurin, Jr., kag ang mga Philippine National Police security nga may kaangtanan sa mga police escort ni Governor Degamo.
Dugang pa ni Fernandez nga ang mga representatives sang Criminal Investigation and Detection Group, National Bureau of Investigation, kag ang mga missing police escorts ang imbitaron man sa panel proceedings.
Nahibaluan nga si House Speaker Martin Romualdez ang nagpatawag sang imbestigasyon.
Ginlaragway niya nga “highly suspicious” ang indi pagsipot sang security detail sa adlaw mismo sa pagpatay kay Degamo.
Nahibaluan nga si Degamo kaupod sa walo ka iban pa ang ginpatay sa sulod mismo sang compound sang iya balay sa Pamplona, Negros Oriental.
‘Wala sang cover up’
Ginpasalig ni Philippine National Police chief Police General Rodolfo Azurin Jr. nga wala sang cover up nga matabo sa imbestigasyon sang mga police escorts ni Negros Oriental Governor Roel Degamo sang adlaw nga ginpatay ini.
Suno kay Azurin, manabat gid ang dapat nga manabat.
Ginpahayag ni Azurin nga nagapakig-angut sila sa anum ka myembro sang police security ni Degamo nga wala nag-duty sang natabo ang krimen.
Nagapakig-angut man ang Philippine National Police sa pamunuan sang Police Regional 7 agud nga mapaathag ang natabo.
Sang ginpamangkot kun sa diin ang lima ka mga personnel, ginpahayag ni Azurin nga gina-account na ang mga ini kag magapatambong sa hearing sa House of Representatives.
Ginpahayag man niya nga ang mga police security ang wala naga-duty sa pareho nga tion kundi, nagatrabaho sa rotation.
Suno sa iya, duha tubtob tatlo ka mga personnel ang posible nga naka-schedule nga mag-duty sang natabo ang pagpang-atake.
