Nakarekord ang Iloilo Provincial Health Office (IPHO) sang duha ka indibidwal nga napatay bangud sa Dengue humalin sang Enero 4 tubtob Abril 4 subong nga tuig.
Sa interview sang Bombo Radyo kay Dr. Maria Socorro C. Quiñon, Head sang IPHO, iya ginpahayag ang una nga napatay ang narekord sa banwa sang Dingle nga naga-edad sang 50-anyos, kag naghalin sa Cebu kag didto pa lang nakitaan na sang sintomas kag sang napauli sa Iloilo sang Pebrero, nagbalik ang iya hilanat kag sakit sang ulo rason nga nagpakonsulta ini sa ospital kag didto nahibaluan nga may ara ini sang dengue kag ginbawian sang kabuhi sang Pebrero 20.
Ang ika-duha naman nga napatay ang narekord sa banwa sang Ajuy, 14-anyos nga lalaki kun sa diin, nagsugod ang hilanat kag sakit sang tiyan sang Marso 23, gin-admit sa ospital sang Marso 26 apang ginbawian sang kabuhi sang Marso 29.
Base sa datos sang IPHO, nagapanguna ang banwa sang Cabatuan nga may 61 nga kaso, ginsundan ini sang banwa sang Calinog nga may 48 ka kaso, Maasin nga may ara sang 19, Passi City kag Oton nga may ara sang tag 17 ka kaso, Dumangas kag Janiauy nga may tag 16 ka kaso, Lambunao kag Tigbauan nga may tag 14, Ajuy, Miagao, San Dionisio, kag San Miguel nga may tag ka 11 ka kaso, Balasan, Concepcion, kag Sara nga may ara sang 10 ka kaso, Banate, Carles, kag Pototan nga may tag 9, Barotac Viejo, Batad, Estancia, kag San Enrique nga may tag walo ka kaso, Duenas, Igbaras, kag Leganes tag 7, Bingawan nga may ara sang 6, Barotac Nuevo, Lemery,Pavia, kag Sta. Barbara nga may ara sang tag 5, Guimbal, Tubungan nga may tag 4, Alimodian kag Badiangan, Leon nga may ara sang 3 ka kaso, Dingle, Mina, San Joaquin, kag Zarraga nga may ara sang 2, Anilao, New Lucena, kag San Rafael nga may tag 1 ka kaso sang dengue.
Sa pangkabilugan, yara na subong sa 432 ang kaso, 66% nga mas manubo ikumpara sa 2025 sa kapareho nga reporting period kun sa diin, nagdangat sa 1,269 ka kaso kag may pito nga ginbawian sang kabuhi.
Nagapadayon naman sang kampanya ang IPHO batok sa dengue kapareho sang 4S kontra dengue Search and Destroy, Self-Protection, Seek Early Consultation, Support Fogging in Hotspots.
