ILOILO CITY- Suportado sang Iloilo Police Provincial Office ang Program for Resilience of Iloilo in Mind and Emotion ukon (PRIME) nga nagatuyo nga mahagan-hagan ang kaso sang pagpanginmatay sa Iloilo.
Sa interview sang Bombo Radyo kay PMaj Rolando Araño, spokesperson sang Iloilo Police Provincial Office, iya ginpahayag nga sa ila nga bahin sang kapulisan, bukas sila para sa sin-o man nga magpangayo sang bulig.
Suno kay Araño, kalabanan sa mga nagautas sang kabuhi ang wala sang tawo nga mahimo nila mapautwasan sang ila balatyagon ukon masugiran sang ila problema.
Pahayag ni Araño, handa ang kapulisan nga maghatag sang psychological first aid sa mga pumuluyo nga nagapalapit sa ila.
Dugang niya, ini ang rason nga ginakampanya man nila sa lebel sang barangay ang amo nga programa agud nga mas mapalapnag ini.
Matandaan nga ginlunsar ang programa sang 2020 para sa promosyon sang psychosocial well-being sang mga Ilonggo sa kasagsagan sang COVID-19 pandemic.
