ILOILO CITY – Nadugangan pa ang numero sang mga witnesses nga nagbali sang akusasyon batuk kay Senator Leila de Lima sa iya drug case.
Ang witness amo si Joel Capones ang napaslawan nga magtambong sang hearing sang nagligad nga bulan bangud sang “high risk security concerns” gani wala natigayon nga mapresentar sang National Bilibid Prison (NBP).
Suno kay Atty. Boni Tacardon, legal counsel ni de Lima, duha ka mga significant developments ang natabo sa padayon nga cross-examination sa prosecution witness nga si Capones.
Suno kay Tacardon, gin-ako ni Capones nga wala siya sang transaksyon kag indi niya kilala si Senator Leila de Lima kag kung may yara man siya sang transaksyon sa iligal nga droga, ini amo kay Jaybee Sebastian gid lamang.
Una na nga ginpahayag ni Capones sang February 2021 nga nag-remit siya sang P1.4 million nga drug money kay Sebastian sang Marso 5, 2014 sa sulod sang payag-payag ni Sebastian sa national penitentiary kag didto niya nakita si anay Justice secretary de Lima.
Gin-kwestiyon sang legal team ni de Lima ang testimoniya ni Capones kag ginpahayag nga wala naka-mention si Sebastian sang 1.4-million nga transaksyon sa iya affidavit antes pa man ini napatay sa national penitentiary sang July 2020 bangud sang COVID-19.
Suno naman kay prosecutor Darwin Cañete, magadepende na sa korte kun ano ang mangin desisyon pagkatapos nga nagbaylo sang pahayag si Capones.
Si Capones ang ika-anum nga witness sang prosecution batuk kay de Lima sa bail hearing.
Ang duha pa ka mga witnesses nga sanday Herbert Colanggo kag Jojo Baligad ang ginalauman nga i-presentar sa masunod nga hearing sa Hunyo 13.
Yara man sila sa korte apang wala nag-testify.
