Patay ang isa ka driver matapos magbunggoanay ang ginamaneho nga van kag ceres bus sa Barangay Fragante, Pandan, Antique subong nga aga.
Sa interview sang Bombo Radyo kay Police Staff Sergeant Arnel De Los Santos, imbestigador sang Pandan, Antique Municipal Police Station, iya ginpahayag nga padulong kuntani sa Kalibo, Aklan halin sa terminal sang Pandan, Antique ang ceres bus nga may karga nga 20 ka mga tawo dala na ang driver kag konduktor sang hinali lang nga ginbunggoan ini sang van nga naglapaw sa piyak nga linya nga padulong sa Pandan, Antique.
Bangud sa impact, dead on the spot ang driver sang van samtang pilason naman ang 10 ka mga pasahero sang ceres bus dala na ang driver sini nga ginhingagaw dala sa malapit nga hospital.
Suno kay De Los Santos, base sa kuha sang Closed Circuit Television (CCTV), madasig ang pagpadalagan sang driver sang van kag madanlog ang dalan bangud bag o lang natapos ang ulan.
Subong, nakilalal-an na ang mga identity sang mga pasahero kag drivers apang padayon pa ang imbestigasyon sang kapulisan natuhoy sa amo nga aksidente.
