ILOILO CITY- Patay ang isa ka amay, pilason ang iya anak kag duha ka iban pa nga mga biktima sa natabo nga bungguanay sang duha ka motorsiklo sa national road sang Barangay Bolo, Carles, Iloilo.
Ang napatay amo si Rolando Aro, 43, samtang pilason naman ang iya pito ka tuig nga anak nga nagaangkas sa iya.
Nag-angkon man sang pilas ang driver sang isa ka motorsiklo nga si Jonathan Fuentes, 22, kag may pilas man ang angkas sini nga si Jesrel Bullos , 20, lunsay mga residente sang Brgy. Abong, Carles.
Sa interview sang Bombo Radyo kay PMaj Harold Rhendora, hepe sang Carles Municipal Police Station, iya ginpahayag nga samtang nagamaneho si Fuentes sa direksyon padulong sa Balasan, hinali lang naglusot ang motorsiklo nga ginamaneho ni Aro kag didto na natabo ang aksidente.
Gindala pa sa ospital si Aro apang ginbawian gid sang kabuhi.
Ginpahayag nga si Aro ang yara sa impluwensiya sang makahulubog nga ilimnon sang natabo ang aksidente.
Sa subong, ginaistoryahanay sang pamilya sang mga involved sa aksidente ang ila desisyon kasunod sang natabo.
