ILOILO CITY – Natalana nga gub-on ang Indonesian football stadium kun sa diin napatay ang 133 ka mga tawo.
Ini ang ginkumpirmar ni Indonesian President Joko Widodo kasunod sang pasalig sang FIFA nga buligan ang reform kag transformation sang sport sa amo nga pungsod.
Nagsapol si FIFA President Gianni Infantino kay Widodo sa Jakarta, masobra duha ka semana pagkatapos sang trahedya kag isa ka tuig antes ang Under-20 World Cup nga hiwaton sa amo nga pungsod.
Nahibaluan nga masobra sa 40 ka mga kabataan ang nalakip sa mga nagkalamatay sa syudad sang Malang sa East Java sang Oktubre 1 nga ginkabig ni Infantino nga “one of the darkest days for football”.
Suno kay Widodo, gub-on ang Kanjuruhan stadium kag magatukod sang bag-o base sa standards sang FIFA.
Ang igabulos nga stadium ang may yara sang nagakaigo nga pasilidad agud nga masiguro ang seguridad sang manughampang kag sang mga supporters.
Ang mayor nga focus amo ang pagpanami sang stadium operations kag fan behaviour subong man ang paghimo sang mga programa may kaangtanan sa football nga ipatuman sa mga eskwelahan.
