ILOILO – Nagpatigayon sang Children’s Forum ang Iloilo Provincial Welfare and Development Office (PSWDO) bilang kabahin sang pagselebrar sang Children’s Month subong nga tuig.
Sa interview sang Bombo Radyo kay Dr. Neneth Pador, head sang PSWDO, iya ginpahayag nga yara sa 100 ka mga bata nga nagaedad 10-14 anyos ang nagtambong kag sila ang nagikan pa sa nagkalain-lain nga banwa sa probinsya sang Iloilo.
Suno kay Pador, kabahin sang mga naistoryahan sa amo nga forum amo ang Family Values, Spirituality among Children, kag Anti-bullying.
Lauman man suno kay Pador ang isa pa gid ka Children’s Congress sa Nobyembre 22, Byernes.
Sa sini nga congress, hatagan sang kahigayunan ang mga bata nga mapakita ang ila mga abilidad paagi sa mga nakahanda nga mga kompetisyon.
Igahatag man sang Department of Social Wefare and Development (DSWD) kag Department of Interior and Local Government (DILG) ang Seal of Child-Friendly Municipality sa 22 ka kabanwahanan sa probinsya.
Dugang pa ni Pador, may yara man sang children’s report nagikan kay Iloilo Governor Arthur Defensor Jr.
Ini tanan nga mga programa ang kabahin sang pagpanikasog sang PSWDO nga mapaintindi sa publiko ang responsibilidad sang kabataan kag kinamatarong nga nagalakip sang survival, participation, development kag protection.
