Ginpanindugan ni Senate Minority Leader Aquilino “Koko” Pimentel III ang iya nga pagpamalabag sa confidential fund sang Office of the Vice President, kag nagpahayag pa nga sa “husto nga tion”, maga-request siya nga kakason ang P500 million nga confidential nga pondo para sa amo nga opisina.
Sa plenary session sang Senado kaangot sa proposed P2.3-billion budget para sa opisina ni Vice President Sara Duterte Carpio, ginpahayag ni Pimentel nga ang paglakip sang confidential funds sa idalom sang Office of the Vice President ang indi mahimo ma-justify sa idalom sang mandato sini sandig sa 1987 Constitution.
Ang mandato sang bise presidente suno kay Pimentel amo nga buslan ang position sa presidente pananglitan mapatay ini, magmasakit, ukon indi ini available sa pag-pamuno sa pungsod.
Nagpamangkot man ang senador kun mahimo ayhan masaylo ang confidential fund agud mapondohan ang operations sang iban nga agencies kaangay sang Philippine Postal Corporation.
Todo-depensa naman si Senator Sonny Angara nga amo ang 2023 national budget sponsor nga chair sang Senate finance committee.
Nag-suggest si Angara nga mangita sila sang iban nga resources para sa iban nga ahensya, kag indi dapat pagtandugon ang iya sang Office of the Vice President bangud siya ang second highest official sang Pilipinas nga nagakinahanglan sang suporta sang Senado.
Ginrason naman ni Pimentel nga sa kahulugan sang Kongreso sa ginatawag nga “confidential funds”, makit-an gid nga indi nagakabagay nga mahatagan sini nga pondo ang Office of the Vice President.
