ILOILO CITY – Amat-amat na nga nagsaka ang koleksyon sang Iloilo Slaughterhouse humalin sang nagligad nga bulan.
Sa interview sang Bombo Radyo kay Simplicio Subaldo, nagadumala sa Iloilo Slaughterhouse, iya ginpahayag nga dako ang nabulig sang inspection kag ang kampanya nga likawan ang backyard slaughtering.
Suno kay Subaldo, ang sin-o man nga madakpan nga nagabaligya sang baboy nga wala ginpaagi sa slaughterhouse ang magabaton sang nagakaigo nga silot.
Ginpahayag ni Subaldo nga may yara na sang plano nga mas pasangkaron ang inspection kag tinguhaan nga masolbar ang problema sa presyuhanay sang karne.
Samtang, suno naman kay Charlie Chan, presidente, Market Vendors Association sa syudad sang Iloilo nga naga-agunto ang manugbaligya bangud sa epekto sang pagdungan sang talipapa nga nagabaligya sa mas barato nga presyo.
Ginpahayag ni Chan nga indi makabawi ang mga manugbaligya bangud nga madamu sila sang ginabayaran sa merkado.
Suno naman kay Iloilo City Councilor Ely Estante, chairman sang Committee on Market and Slaughterhouse, kinahanglan nga mahagan-hagan ang mga magagmay nga manugbaligya sa guwa sang merkado.
