ILOILO CITY – Gin-aprobahan sang Iloilo City Council nga hatagan sang otoridad si Mayor Jerry Treñas nga pirmahan ang Memorandum of Agreement sa tunga sang Iloilo City Government kag Department of Social Welfare and Development.
Suno kay Iloilo City Councilor Jay Treñas, ang nasambit nga Memorandum of Agreement ang para sa pagpanghatag sang bulig sa mga pumuluyo bangud sa ginapatuman nga Enhanced Community Quarantine.
Ginpahayag ni Treñas nga sakop sang ayuda amo ang Social Amelioration Program nga P6,000 sa sulod sang duha ka bulan, Pantawid Pamilyang Pilipino Program, Assistance to Individuals in Crisis Situation kag food and non food items.
Masobra sa P1 Billion nga pondo ang gintalana para sa 86, 018 beneficiaries sa syudad sang Iloilo.
Samtang, may yara naman sang gintalana nga P100 Million para sa cash for work program.
Sa pagpaathag ni Treñas, nagalab-ot sa P250 ang igahatag sa mga nagatrabaho sa Community Kitchen sa sulod sang 20 ka adlaw.
20,000 ka benepisyaryo suno sa natungdan ang makabaton sang nasambit nga ayuda gikan sa gobyerno.
