ILOILO CITY – Ginakabig nga isa ka sahi sang pagpangbusal sa mga manunudlo ang ginpagwa nga Department of Education Order No. 29 ni Vice President kag Education Secretary Sara Duterte.
Ini ang reaksyon sang Alliance of Concerned Teachers.
Sa amo nga order, ginpahanumdom ni Duterte ang tanan nga teaching kag non-teaching staff sang Department of Education nga likawan ang “relationships, interaction, kag communication” lakip na ang pag-follow sa mga estudyante sa social media “sa guwa sang school setting.”
Nalakip ini sa Department of Education order No. 49 nga may title: “Promotion of Professionalism in the Implementation and Delivery of Basic Education Programs and Services.”
Ginpaathag dugang ni Department of Education Spokesman Michael Poa ang buot silingon sang “sa guwa sang school setting” amo ang paggamit sang social media nga indi intended para sa learning ukon instruction sang klase.
Sa interview sang Bombo Radyo kay Vladimir Quetua, national chairperson sang amo nga grupo, iya ginpahayag nga ang ini nga order ang nagadumili sa mga manunudlo nga maghambal batuk sa mga isyu nga ginapangatubang sang ahensya.
Dugang pa niya, lain kuntani ang ila nga ginalauman nga mangin tikang sang ahensya.
Pahayag niya dugang, sa tion nga may interaction ang mga manunudlo, mas madamo ang mahibaluan sang mga estudyante.
