Indi na magpasaka sang kaso ang bana nga nakadakop sa iya asawa nga nagapangluib sa isa ka lodging house sa Calinog, Iloilo.
Ang asawa amo si Alyas Neneng, 26-anyos, samtang ang other man amo si Alyas Nonoy, 37-anyos, lunsay kasado kag residente sang nasambit nga banwa.
Sa interview sang Bombo Radyo kay Police Major Miles Dieron, hepe sang Calinog Municipal Police Station, iya ginpahayag nga madugay na nga nagasuspek ang bana nga may other man ang iya asawa, rason nga nagpakig-angot ini sa kapulisan.
Suno kay Dieron, ginsundan sang bana ang iya asawa sa lodging house kag didto sini nakumpirma nga may ginahimo ini nga kamala-malahan.
Ginpahayag man sini nga kilala sang bana ang other man sang iya misis.
Gilayon naman nga gindala sa Calinog Municipal Police Station si Alyas Neneng kag Nonoy matapos nga naaktohan nga nagahampang sang kalayo.
Apang, bangud sa indi na magpasaka sang kaso ang bana, ginbuy-an na lang ang mga natungdan.
