ILOILO CITY- Patay ang lima ka crew members sang Japan Coast Guard kag isa ang pilason matapos nga mahugpaan sang Japan Airlines sa Haneda Airport sa Tokyo nga nagresulta naman sa pagkasunog sang amo nga passenger plane.
Suno kay Bombo Josel Palma, International Correspondent sa Japan, sa 379 ka mga pasahero sang passenger plane nga Japan Airlines flight 516, naglab-ot sa 17 ang narekord nga pilason matapos nga masunog ang eroplano.
Ginpahayag ni Palma nga padulong kuntani ang eroplano sang Japan Coast Guard sa Western Japan para magdul-ong sang relief goods sa mga pumuluyo nga naapektohan sang linog sang aksidente ini nga nabungguan sang Japan Airlines flight 516.
Masobra 100 ka mga firetrucks ang nagpadulong sa airport para nga magbulig sa pagpalong sang kalayo.
Padayon naman nga ginaimbestigaran sang otoridad kun ngaa wala mahawanan ang runway nga nangin kabangdanan sang amo nga trahedya.
