ILOILO CITY – Ginlubong na ang longest-reigning monarch sang Britanya nga si Queen Elizabeth II.
Halin sa historic nga Westminster Hall kun sa diin ginpatigayon ang apat kag tunga ka adlaw nga lying in state, ang lungon sang reyna ang gindala sa Westminster Abbey para sa isa ka state funeral.
Ini ang ginpamunuan ni King Charles III, sang iya mga utod kag sanday Prince William kag Prince Harry nga gin-updan sang malapit 200 ka mga pipers kag drummers.
Sa state funeral, nagtambong ang masobra 2,000 ka tawo — nga ginalakipan sang 500 ka mga world leaders, lakip sanday US President Joe Biden, Emperor Naruhito sang Japan, Chinese Vice President Wang Qishan, kag South African President Cyril Ramaphosa.
Magluwas sa mga nagtambong sa sulod sang Westminster Abbey, halos isa ka milyon ka tawo ang nagpadulong sa London agud nga magsaksi sa lubong.
Pagkatapos naman sang state funeral, ang lungon sang reyna ang gindala sa Wellington Arch ukon sa Hyde Park Corner pinaagi sa isa ka procession nga nagalawig sang 2.4 kilometers.
Masobra sa 4,000 ka mga military personnel ang nag-upod sa parada kag dugang nga 2,000 nga nagalinya.
Ini ang gintunga sa pito ka mga grupo nga ginalakipan sang forces nagikan sa Commonwealth, Royal Air Force, Army, Navy kag Marines.
Ini ang nag-agi sa Broad Sanctuary, Parliament Square, Whitehall, Horse Guards Parade, Horse Guards Road, The Mall,kag sa Constitution Hill.
Sa Wellington Arch, ang lungon ang ginsaylo sa State Hearse agud nga dal-on sa Windsor.
Sa paghalin sa Wellington Arch, ang parada ang naghatag sang Royal Salute kag ang National Anthem ang ginpatukar.
Halin sa Wellington Arch, nag-agi ang lungon sakay sa State Hearse sa South Carriage Drive padulong sa Albert Memorial kag halin didto, gindala na sa Windsor.
Halin sa Albert Road, ginpatigayon ang Long Walk sa 4.25-kilometre-long straight path nga nagasugpon sang Snow Hill sa Windsor Great Park kag sa Windsor Castle.
Ang procession ang nag-agi sa Cambridge Gate, Cambridge Drive, George IV Gate, sa Quadrangle, Engine Court, Norman Arch, Chapel Hill, Parade Ground, Horseshoe Cloister Gate kag Horseshoe Cloister.
Ang procession ang nag-untat sa West Steps sang St George’s Chapel para sa commital service.
Ang crown, orb kag scepter ang ginkuha sa lungon kag ginbutang sa altar.
Ang Lord Chamberlain nga amo ang most senior official sa royal household ang nag-break sang iya ‘Wand of Office’ nga naga-signify sang pag-untat na sang service sa soberanya kag ibutang sa lungon.
Ini ang papanaog sa royal vault.
Sa isa ka private family service, ang lungon ni Queen Elizabeth II kag sang iya nga bana nga si Prince Philip ang magka-upod nga ginlubong sa King George VI Memorial Chapel kun sa diin, ang iya nga mga ginikanan kag utod nga babayi ang didto man nakalubong.
