Maga-imbestigar ang senado sa natabo nga “technical glitch” nga rason sang pagka-delay sang masobra 300 ka flights sa New Year’s Day sa Ninoy Aquino International Airport (NAIA).
Suno kay Senator Grace Poe, chair sang Senate committee on public services, ginakabig sang panel ang amo nga insidente nga may kaangtanan sa ‘national security’ kag ‘safety’.
Sa imbestigasyon ginalauman ga matumod kun sin-o ang may liability kag matumod man ang mga tikang agud nga indi na maliwat ang kaangay nga malfunctions.
Patigayunon ang hearing suno sa senadora kun ma-restore na ang normal flight operations sa amo nga airport.
Duda naman si Senator JV Ejercito nga may sabotahe sa amo nga insidente, ukon kun wala man, dapat nga tumuron kun ‘plain incompetence’ ang natabo.
Madumduman nga masobra anum ka oras ang delay sang flights kadungan sang Bag-ong Tuig bangud sa power outage nga amo ang nagpatay sa Air Traffic Management System sang Civil Aviation Authority of the Philippines (CAAP).
Ang radar kag communication system amo ang ginagamit sang aviation authorities agud ma-monitor ang location sang mga eroplano kag i-man ang traffic airspace capacity nga nagasulod ukon nagabiya sa Philippine air space. Ini nga upgraded system ang nainagurahan sang 2018 pa gid lamang.
Ginmuno man ni Ejercito kun ngaa wala sang back up system ang CAAP agud mag-responde sa gilayon sa mga panahon sang emerhensya.
Para naman kay Sen. Nancy Binay, kinahanglan ang “full audit” sang navigational and communications equipment nga na-install sa tanan nga airports sa pungsod.
Suno kay Binay, ang natabo sang Domingo nagalaragway lamang kun ano ka vulnerable ang pungsod kun may matabo nga technical glitch — hardware man ini ukon software glitch.
Suno naman kay Senator Sherwin Gatchalian, dapat siguruhon nga indi na liwat matabo bangud negatibo ang mangin paglantaw sang foreign visitors sa Pilipinas.
Lain naman ang napanimahuan ni House Deputy Minority leader and ACT Teachers party-list Rep. France Castro. Suno kay Castro, indi dapat paggamiton ang natabo sa airport bilang rason agud i-privatize ang NAIA.
Makaduluda suno kay Castro nga sang Disyembre 30, ginpahayag ni Transportation Secretary Jaime Bautista nga plano sang Marcos Jr administration nga iduso ang privatization sang amo nga airport, kag duha ka adlaw lang ang nakaligad, may natabo na nga glitch kag naapektuhan ang masobra 65,000 ka mga pasahero.
Suno naman sa Malacañang, may yara sang maid-id nga imbestigasyon nga himuon ang nagakaigu nga mga ahensya. ##
