Nagbalik sa Pilipinas si President Ferdinand ‘Bongbong’ Marcos Jr. halin sa state visit sa China dala ang paglaum nga maganubo na ang tension sa West Philippine Sea kag mabuhinan na ang insidente sang harassment.
Kasunod ini sang iya pagpakigsapol kay Chinese President Xi Jinping kun sa diin nag-propose siya sang pagpabaskog sang bilateral team nga maga-discuss sang mga isyu sa tunga sang Pilipinas kag China.
Suno pa sa presidente, may yara subong sang existing bilateral mechanisms nga naga-discuss sang mga isyu sa tunga sang duha ka pungsod, apang mas maayo suno sa iya kun ang myembro sang bilateral teams ang may yara sang direkta nga access sa ila nga duha ni Xi.
Ang punto sang presidente amo nga nagakatabo ang insidente sang harassment kag encroachment bangud sang kakulang sang komunikasyon.
Halimbawa sa West Philippine Sea suno sa presidente, nagakatabo ini sa mga manugpangisda, Philippine Coast Guard, Chinese Coast Guard kag sa ila nga Navy.
Sa isyu naman sa rocket debris suno kay Marcos, kuntani kun sa sunod, ma-inform man anay ang China antes ini magpalupad sang rocket agud kun may magtupa sa Pilipinas, ma-recover, kag mahatag ini sa China bangud wala man sang interes ang Pilipinas nga huptan ini. ##
