ILOILO – Napun-an sang pagpasalamat ang ginpatigayon nga Dinagyang 2020 Fellowship Night nga ginpangunahan sang Media ang Publicity Committee.
Ini ang gintambungan sang mga kilala nga personalidad sa pagpamuno ni Dr. Rogelio FLorete, Chairman sang Media and Publicity Committee kag Chairman sang Florete Group of Companies, Iloilo Festivals Foundation Inc. Chairman Judgee Peña, Iloilo City Mayor Jerry Treñas, Iloilo Governor Arthur Defensor Jr., Iloilo City Lone District Congresswoman Julienne “Jam Jam” Barronda kag iban pa.
Ginpasalamatan ni Dr. Rogelio FLorete, ang tanan nga katapo sang media nga naghugpong para sa mas ginpanami Dinagyang 360.
Suno kay Dr. Florete, ginkalimatan anay pagkompetensyahanay para sa Dinagyang Festival.
Dako ang nangin papel sang Media and Publicity Committee sa kadalag-an sang Dinagyang Festival 2020 nga nangin bantog sa iban nga lugar.
Ginpasalamatan ni Iloilo Governor Arthur Defensor Jr., ang mga katapo sang media bangud paagi sa ila napalab-ot niya ang iya mensahe sa mga pumuluyo.
Ini ang ginpahayag sang gobernador kadungan sang Dinagyang 2020 Fellowship Night nga ginhiwat kagab-i sa Plazuela de Iloilo.
Suno kay Defensor, daku ang katungdanan sang media sa pagpahangop kag pagpahibalo sa mga pumuluyo.
Madamo man ang nagtambong sa pagsaulog sang Dinagyang Festival bangud sa maayo nga promotion sang Media and Publicity Committee.
Dako man nabulig sang madinalag-on nga promotion sang Media and Publicity Committee sa mga negosyante sa Iloilo.
Ini ang nangin pahayag ni Iloilo City Mayor Jerry Treñas matapos nga nakita niya mismo ang pag-uswag sang negosyo.
Ginpahayag ni Treñas nga base sa nakita niya nga resulta sang Dinagyang Festival 2020, mahambal niya nga nagpangibabaw ang Dinagyang Festival sa tanan nga festival sa bilong nga pungsod.
Nagpasalig naman ang natungdan, mas panamion pa gid ang Dinagyang Festival sa masunod nga tuig.
Samtang gindayaw ni Iloilo Lone District Congresswoman Jamjam Barronda ang pagbuligay sang publiko kag pribado nga sektor sa ginpatigayon nga Dinagyang Festival.
Natigayon ang tanan nga plano kag bangud sini, iya gid nga ginapanginbulahan ang tanan.
