ILOILO CITY – Nagdangat na sa 42% ang mga barangay ang na deklarar na nga drug-cleared sa syudad sang Iloilo.
Pinaka-ulihi nga na deklarar amu ang 16 ka mga barangay sa syudad sa diin 199 ka mga candidate barangay ang nag-apply.
Sa interview sang Bombo Radyo kay Shey Tanaleon, tagapamaba sang Philippine Drug Enforcement Agency-6 iya ginpahayag nga dako na nga bagay ang 16 ka mga barangay nga na nakapasar sa syudad.
Suno kay Tanaleon, mas madamo sang na aprubahan subong nga tuig kun ikumpara sang mga gintalikdan nga tuig.
Dugang sang natungdan, isa sa mga kabangdanan kun ngaa may yara sa gihapon sang mga barangay nga wala na deklarar nga drug-cleared amo ang una, nagakinahanglan nga magpaidalom sa Community based Rehabilitation and Reformation Program ang tanan nga mga drug personalities sa kada barangay nga isa sa mga requirements agud ma deklarar nga drug-cleared.
Ang rehabilitation ang libre nga gina patigayon sang Department of Health apang madamo sa gihapon ang wala nakatapos bangud madamo sang wala nagapadayon.
Ika-duha amo ang madamo nga pangayaw sa mga barangay kaangay nalang sang mga naga board ukon temporaryo lang nga naga puyo sa ila lugar sa diin kun madakpan sila nagakaapektuhan ang status sang barangay.
Santo sa pahayag ni Tanaleon, wala na kun tani sang rason nga indi nila matapos ang rehabilitation bangud nahatag na sang gobyerno ang tanan nila nga kinahanglan kag suporta.
