ILOILO CITY – Ginpanginwala sang Brgy San Juan, Molo, Iloilo City nga halog ang ila seguridad sa ila barangay rason kun ngaa madamo sang nagkaladakpan nga nagalapas sa ginapatuman nga curfew nga nagikan sa ila lugar.
Sa interview sang Bombo Radyo kay Punong Barangay Pascual Espinosa, sang nasambit nga barangay iya ginpahayag nga hugot nila nga ginapatuman ang curfew sa ila lugar apang bangud tuman ka lapad nabudlayan sila nga bantayan ang mga pumuluyo.
Suno kay Espinosa, may yara man sila sang mga volunteer nga nagabulig kag nagalibot sa ila barangay agud ma tsekyar nga nagasunod ang tanan nila nga mga pumuluyo.
Sa pagkamatuod suno sa natungdan, gamay nalang ang mga nagakadakpan nga nagalapas sa curfew sa ila nga lugar.
Nahibaluan nga may yara na sang tatlo ka Persons Under Investigation ang Brgy. San Juan, Molo samtang 32 naman ang Persons Under Monitoring nga gilayon naman nga ginpaidalom sa quarantine.
Samtang ginalibot naman mismo ni Punong Barangay Gary Patnubay sang Bgry. East Baluarte, Molo, Iloilo City ang iya nga baranagy agud ma tsekyar nga naga sunod ang iya mga pumuluyo sa mga pagsulundan agud man mapalayo sila sa COVID-19.
Suno kay Patnubay pagpatak sang alas otso sa gab-i sya mismo ang nagalibot sa ila barangay kag ginapanugyanan niya ang mga pumuluyo may kaangtanan sa importansya sang mga pagsulundan para sa ila kaayuhan.
Dugang sang natungdan, nakasugod na sila panagtag sang mga relief goods gamit man ang ila nga calamity fund sa barangay nga siya man mismo ang nagadul-ong.
Santo sa pahayag ni Patnubay, tanan nga mga pumuluyo ang nahatagan sang relief goods kag wala sang pinilian.
Sa subong may yara na sang apat ka Person Under Investigation sa ila barangay sa diin tatlo diri ang naka graduate na sa quarantine kag nahatagan na sang certificate kag ginahulat nalang nila nga matapos ang isa pa.
Samtang may naman sla sang isa ka persons under monitoring nga may yara sang travel history sa Singapore kag nakabatyag sang symtomas sang COVID-19 kag sa subong padayon nga nakapaidalom sa quarantine.
