Nakahanda na ang malapit 3,000 ka mga pampubliko nga eskwelahan sa Western Visayas para sa pagbukas sang klase sa Lunes, Hunyo 8.
Sa interview sang Bombo Radyo kay Mr. Hernani Escullar Jr., public affairs and information officer sang Department of Education (DepEd) Region 6, iya ginpahayag nga sa preliminary enrollment database sang talatapan, yara na sa masobra 717,400 ka learners ang naka-enroll para sa bag-o nga school year.
Bilang kabahin sang pagpanghanda, gin-updan sang mga ginikanan, stakeholders, mga estudyante, volunteers kag iban pa ang tuigan nga Brigada Eskwela.
Maga-transition naman subong ang mga eskwelahan sa three-term academic calendar. Ini ang rason kun ngaa nga ginkumpleto man sang regional office ang serye sang mga orientation para sa mga manunudlo, school heads, kag division personnel agud masiguro nga matalunsay ang implementasyon sang revised school calendar.
Gin-ako sang talatapan nga wala man nakaluwas ang Western Visayas sa kakulangan sang classrooms nga isa naman ka nationwide concern. Sa Rehiyon VI, ginabanta nga 5,000 ka hulot-klasehan ang kulang.
Sa pihak sini, ginapasiguro sang DepEd suno kay Escullar nga indi ini mangin upang sa pagtuon sang mga kabataan.#
