ILOILO CITY – Gin-abisuhan sang Philippine Embassy sa Moscow ang mga Filipino sa Russia nga mag-aligmat kag maghalong kasunod sa mga report sang armed rebellion sang private mercenary group.
Sa advisory nga ginpagwa pinaagi sa Facebook page, nagpanugyan ang embahada sa mga Filipino nga likawan ang pagpadulong sa mga matawo nga lugar, magpakigbahin sa mga protesta, kag magpahayag sang political opinion sa ila tagsa ka social media.
Gina-abisuhan man ang mga ini nga kun mahimo, likawan ang pagbyahe sa iban nga rehiyon.
Nagpanugyan man ang embahada sa mga Filipino nga nagatinir sa Rostov-on-Don, Belgorod, kag sa mga lugar nga malapit sa Ukraine-Russia border nga magpahibalo sang ila nga sitwasyon.
Suno kay Department of Foreign Affairs Undersecretary Eduardo de Vega, ang embahada ang nagapakig-angut sa walo ka mga Filipinos nga yara sa Rostov-on-Don.
Ang walo ka mga household employees ang yara sa hilway nga sitwasyon upod sa ila mga employers.
Dugang pa niya, ang kalabanan sa 10, 000 nga mga Filipinos sa Russia ang yara sa Moscow kun sa diin, nagapabilin nga normal ang sitwasyon.
Ang mga ini ang gin-abisuhan nga magtinir lamang sa sulod sang ila mga balay kag wala pa sang nagahingyo sang repatriation.
Una na nga ginpahayag ni Russian mercenary chief Yevgeny Prigozhin nga anay kaalyado ni Putin, nga nakontrol na nila ang Russian city nga Rostov-on-Don nga kabahin sang ila tinutuyo nga pahalinon ang military leadership.
Ginpahayag man sini nga may yara sang 25, 000 fighters nga nagapadulong sa Moscow agud nga ibalik ang hustisya kag gin-alegar pa sini nga madamo sang mga militar ang napatay sang iya Wagner private militia sa isa ka air strike.
Wala siya sang may ginpakita nga ebidensya kag ginpanginwala man ini sang defense ministry.
Pila lamang ka oras ang nakaligad, nagmandu si Prigozhin sa iya mercenaries nga untaton na ang pagsulod sa Russian capital kag magbalik na sa ila field camps sa Ukraine.
Suno sa iya, indi niya gusto nga magdanak ang dugo.
Una na nga ginpahayag ni Russian President Vladimir Putin nga pasabton niya ang grupo ni Prigozhin.
Sa iya address, ginlaragway pa niya ini nga isa ka akto sang pagpang-traidor sa pungsod.
