ILOILO – Ginklaro ni Iloilo City Councilor Jay Treñas ang ordinansa nga iya ginaduso nga naga plano nga ipaidalom sa mercy killing ang mga layaw nga ido sa syudad sang Iloilo.
Ini ang kasunod sang pag agunto sang pipila ka mga cause oriented groups kag animal welfare groups.
Sa interview sang Bombo Radyo kay Treñas, iya ginpahayag nga ang mga ido lang nga may yara sang makalalaton nga balatian kag mga rabid lang ang ipaidalom sa mercy killing bangud makabig na ini nga peligruso sa iban nga ido kag sa mga pumuluyo.
Suno kay Treñas, tinghuaan nila nga ihold kag tatapon ang mga layaw nga ido nga ma rescue apang prioridad nila nga pangitian ini sang mga bag o nga tag iya.
Dugang ni Treñas, gina respesto kag na intindihan niya ang pag agunto sang mga cause oriented groups kag animal welfare groups bangud siya mismo ang may yara sang mga hinuptanan apang nagapati siya nga nagakadapat lang nga iimplementa ang nasambit nga ordinansa bangud isa man ini sa mga kinahanglan kun mangin highly urbanize city na ang Iloilo.
Santo sa pahayag ni Treñas, ginduso niya ang nasambit nga ordinansa agud mangin responsable man ang mga pet owners sa ila mga tagsa ka hinuptanan kag nagaka apektuhan naman ang animal welfare kag health sanitation sang syudad kun padayon nga pabay-an ang mga layaw nga ido nga naga liho-liho sa dalan.
Samtang ginpahayag sang natungdan nga nagapangita na sang lugar ang City government nga posible pahamtangan sang city pound kun sa diin ibutang ang mga na rescue nga mga layaw nga ido.
Gina tan-aw nga lugar amo ang sa may bahin sang Brgy. Lanit Jaro nga malayo sa madamo nga panimalay bangud man sa baho sini kag gahod.
