Nagpasalig ang National Youth Commission (NYC) nga dal-on sa Iloilo ang mga programa sini agud nga mabuligan pa ang mga kabataan nga mahulma ang ila papel sa sosyudad.
Ginpahayag ini ni NYC Chairperson and Undersecretary Joseph Francisco Ortega kadungan sang ginpatigayon nga 2026 Provincial Teen Center Day sa Iloilo Convention Center.
Sa interview sang Bombo Radyo kay Ortega, iya ginpahayag nga lakip sa ila himuon amo ang training sa mga pamatan-on kaangot sa cybersecurity agud nga matapna na ang lapnagon nga mga scam.
Kun may masangkad na nga ihibalo ang kabataan suno sa iya, sila na mismo ang maga-edukar sa ila nga ginikanan agud nga indi matuntuhan online.
Sa amo nga pagtilipon, ginhatagan man sang importansya sang opisyal ang pagpahanumdom sa ginikanan kag kabataan sang pag-practice sang cyber hygiene ukon ang pagtuon kun paano magamit ang social media sa husto nga paagi.
Sa separado nga interview, na-mensyonar sini ang plano nga dal-on ang Meta team sa Iloilo agud nga maka-trabaho kaupod sa provincial government sa mga programa nga naga-promote sa ethical kag responsable nga paggamit sang social media.
Magluwas diri, ginpahayag man ni Ortega nga dal-on sa Visayas partikular sa Iloilo ang tatlo ka mga convention sang komisyon sa masunod nga tuig.
Nahibaluan nga sa amo nga pagtilipon, nagtambong ang ginabanta 700 teen helpers kag coordinators.
Sandig sa Iloilo Provincial Government, ang teen centers amo ang hilway nga mga lugar kun sa diin makapangayo sang giya ang kabataan, makapangita sang mga abyan, kag makapadayon ang ila nga mga handum sa kabuhi.
Sa idalom sang Teen Center 2.0 program, may yara sang 102 nga school-based teen centers sa probinsya sang Iloilo lakip na ang 21 nga ginakabig stand-alone facilities.#
