ILOILO CITY- Ginapaandaman sang Philippine National Police ang ila nga mga personnel nga naka-deploy sa field bangud sa posible nga sakit nga mahimo nila maangkon subong nga tuman ang init.
Sa interview sang Bombo Radyo Iloilo kay Police Colonel Joeresty Coronica, director sang Iloilo City Police Office, iya ginpahayag nga nabalaka ini para sa ikaayong lawas sang mga kapulisan ilabi na nga uso ang heat stroke kag dehydration kun tuman kataas ang temperatura sa palibot.
Panugyan ni Coronica nga magdala gid sang tubig kun naga-duty sa field kag magsuksok sang proteksyon kontra sa init kaangay sang kalo ukon payong.
Kinahanglan man nga likawan ang pag-inom sang mga diuretic nga bulong nga nagadulot sang masami nga pag-ihi.
Dapat man suno sa iya nga limitahan sang mga pulis ang pag-inom sang kape kag mga energy drink subong nga tag-ilinit.
