(UPDATE: 8:30 AM, MARCH 12) Gina-follow up na sang Iloilo City Urban Poor Affairs Office (ICUPAO) kun kuwalipikado ang mga nasunugan nga residente sa Zone 1, Barangay Old Airport, Mandurriao, Iloilo City nga mahatagan sang bag-o nga lugar sa syudad agud nga sarang maistaran.
Sa latest report nagikan sa City Social Welfare and Development Office (CSWDO), ginpahayag nga 47 ka mga balay ang naabo gid sang kalayo, samtang siyam naman ang partially destroyed.
Sa interview sang Bombo Radyo kay Iloilo City Mayor Jerry Treñas, iya ginpahayag nga kun ma-qualify ang mga residente, mahimo sila mapapuyo sa duta nga nabakal sang Iloilo City Government sa Barangay Sambag, Jaro.
Kahapon, sang natabo ang sunog, tuman ka budlay para sa fire personnel ang magsulod sa lugar bangud ikit-ikit ang mga pamalay kag nagagirinual ang mga residente nga maka-vacate sa lugar.
Informal settlers ang kalabanan sa mga biktima sa amo nga sunog.
SA FINANCIAL ASSISTANCE
Una na nga nagpasalig si Treñas nga magahatag sang P10,000 sa mga tag-iya sang totally destroyed nga mga balay, kag P5,000 sa mga tag-iya sang partially destroyed.
Sa sunog sa General Hughes, Iloilo City Proper sang nagligad nga Pebrero 22, nahatag ang ayuda duha tubtub tatlo ka adlaw matapos nagluntad ang insidente. Ginahikot na subong sang CSWDO ang financial assistance suno sa alkalde.
DUGANG NGA BULIG
Yara temporaryo nga nagatinir sa Mandurriao Elementary School ang mga apektado nga mga residente.
Ginpasigurado man sang alkalde nga gina-provide ang food kag non-food items para sa ila.
Bukas man ang mga barangay officials sa pagbaton sang mga donasyon halin sa mga pribado nga mga indibidwal.
RASON SANG SUNOG
Padayon pa subong nga gina-imbestigaran sang otoridad partikular na sang Bureau of Fire Protection (BFP) kun ano gid ang ginhalinan sang sunog.
May mga impormasyon suno kay Treñas nga may nag-spark nga kuryente antes madasig nga nagmakot ang kalayo kag ginlamon ang amo nga residential area. Posible nga electrical in nature ini suno sa alkalde.
Ini ang ginapahayag pinakadaku nga sunog nga natabo sa syudad subong nga tuig 2022. ##
