Nagareklamo ang pila ka nasunugan nga residente sa Zone 1, Barangay Old Airport, Mandurriao, Iloilo City bangud sa ginapahayag indi patas nga listahanay para sa makabaton sang cash assistance.
Isa sa nagapalab-ot sang reklamo amo si John Sayo nga nagalumon lang sa balay sang iya nga tiya.
Suno kay Sayo, gin-ubos man lamon sang kalayo ang tanan sa ila nga mga gamit kag wala gid sila sang nasalbar.
Apang nagalibog ang ulo sang natungdan kun ngaa nga wala ini sang mabaton nga cash assistance kundi limitado lang sa food kag non-food items nga amo ang ginapanagtag sa Mandurriao Elementary School kun sa diin sila temporaryo nga nagatinir.
SABAT SANG CSWDO
Una na nga ginpahayag nga P10,000 ang ihatag sa tag-iya sang totally damaged nga balay, samtang P5,000 naman para sa partially damaged.
Paathag ni Junah Alidron, social welfare officer III sa distrito sang Mandurriao, sandig sa guidelines sang Iloilo City Government, indi na makabaton sang cash assistance ang extended famiy.
Suno kay Alidron, kun sin-o lang ang lehitimo nga tag-iya sang balay, siya lang ang hatagan sang cash aid halin sa syudad. ##
