ILOILO CITY – Ginpahayag ni Pope Francis nga indi dapat mangin neutral ang mga simbahan sa South Sudan kundi, gamiton ang tingog batuk sa inhustiya kag pagpang-abuso sang gahum.
Ini ang ginpahayag ni Pope Francis sa iya pagpadulong sa amo nga pungsod kaupod ang duha pa ka mga Christian leaders.
Sa una niya nga adlaw sa amo nga pungsod, nagpakigkita si Francis sa mga Catholic bishops, mga pari kag madre sa cathedral sang St. Therese sa capital nga Juba.
Nagdangat sa 2.2 million ka tawo ang internally displaced sa South Sudan nagikan sa kabug-usan nga populasyon nga nagdangat sa 11.6 million, kag dugang nga 2.3 million nga nagpalagyo sa pungsod bilang refugees suno sa United Nations.
Madamo sang pigado kag nagutman sa amo nga pungsod kag duha sa tatlo ka tawo ang nagakinahanglan sang humanitarian assistance nga nangin resulta sang inaway kag tatlo ka tuig nga makahalanusbo nga baha.
Sa cathedral, ginpamatian ni Francis ang istorya sang isa ka madre kun sa diin, ang duha sini ka utod nga babayi ang napatay sa ambush malapit sa Juba sang 2021.
Ginpahanumdom man sini ang mga katapo sang simbahan sang ila tinutuyo nga mangin ministro sang Ginuo sa duta nga napalibutan sang inaway, kaakig, pagpang-abuso kag kapigaduhon.
Sa ikaduha nga adlaw sang pagbisita sang Santo Papa sa lugar, natalana ini nga magpamati sa istorya sang mga naapektuhan sang kinagamo.
Pamunuan man niya ang “pilgrimage of peace” sa isa ka open-air ecumenical prayer vigil sa isa ka mausoleum para sa liberation hero sang South Sudan nga si John Garang.
