ILOILO CITY- May yara sang pagpang-alang-alang ang isa ka sugar industry player sa mahimo matabo sa tion nga madayon ang plano ni President Ferdinand ‘Bongbong’ Marcos Jr. nga i-revive ang Philippine Sugar Corporation nga una nga gin-establisar sang iya amay nga si late President Ferdinand E. Marcos sang 1983.
Sa interview sang Bombo Radyo kay Iloilo 3rd District Board Member Matt Palabrica, iya ginpahayag nga welcome development kun epektibo ini nga maka-function
para sa pagpondo sa pag-angkon, pag-rehabilitate, kag pagpalapad sang sugar mills, refineries, kag iban pa nga kaangay nga pasilidad nga amo man ang nangin katuyuan sini sadto.
Apang,suno kay Palabrica, ginakabalak-an niya nga maabusuhan ini sang mga tawo sa gobyerno kag sang iban nga players sa baylo nga tungdan ang responsibilidad sini base sa nakasaad sa Presidential Decree No. 1890.
Nahibaluan nga isa sa mga rason nga gin-abolish ini sang administrayson ni Presidente Rodrigo Duterte amo ang 2017 Commission on Audit (COA) report nga nagbuyagyag nga naghatag ang amo nga korporasyon sang P208.088 million sa private corporations, cooperatives, foundations kag single proprietorships nga nagakontra sa nasaad sa iya mandato.
Dugang pa ni Palabrica, kun madayon gid man ang pag-revive sang Philippine Sugar Corporation, mas bentaha ini agud matutukan ang produksyon sang kalamay kag ma-augment ang Sugar Regulatory Administration nga tuman ka gamay ang manpower.
Samtang, kumporme naman si Palabrica sa pag-apruba ni Presidente Marcos sa importasyon sang tubtub 150,000 metriko tonelada sang kalamay.
Suno kay Palabrica, kulang na gid man ang suplay sang kalamay bangud sirado na ang milling season.
Apang, nagalaum ang natungdan nga indi maapektuhan sang imported nga kalamay ang masunod nga milling season bangud pat-ud nga mamierdehan na naman ang mga local sugar producers.
