ILOILO CITY- Pila ka bulan antes ang ginakalangkagan nga coronation night sang Miss Universe Philippines 2024, isa na naman ka kandidata ang nagwithdraw sa pageant.
Ini amo ang representative sang Angeles City, Pampanga nga si Joanne Thornley.
Sa joint statement nga ginpost sang Miss Universe Philippines Angeles City sa ila nga social media page, nagdesisyon ang pageant organizers nga i-withdraw ang ila tiglawas sa pageant bangud sa isyu sa ikaayong lawas.
Nagpangayo naman sang pasaylo ang pageant organizers sa mga teams nga nagbulig sa pageant journey ni Miss Angeles City.
Nahibaluan nga antes ang announcement, nangin kabahin na ang Angeles City representative sang pila ka pageant activities kaangay sang official photoshoot para sa headshots kag swimsuit photos.
Sa subong, yara na lang sa 54 mga kandidata ang maga- compete para sa oportunidad nga itiglawas ang Pilipinas sa masunod nga Miss Universe pageant sa Mexico.
