Sa labing una nga tion sa sulod sang 36 ka tuig, nakaabanse na gid man sa knockout stage ang Morocco matapos ini nga nagpangibabw sa Group F kag ginlutos ang Canada sa skor
2-1, sa ila hampang nga ginpatigayon sa Al Thumama Stadium sa Qatar.
Ang Morocco ang ikaduha nga African Country sunod sa Senegal nga nag-qualify sa World Cup last 16 subong nga 2022.
Maragtason ini para sa bilog nga pungsod bangud ini ang ikaduha nila nga pagsulod sa knockout stage halin sang 1986 sa Mexico sang ginlutos nila ang Portugal sa skor nga 3-1, sa group match.
Antes ang kadalag-an batok sa Canada, nangin kasumpong sang Morocco ang 2018 finalists nga Croatio kag nagtakop sa 0-0 draw ang match.
Sa sunod nila nga hampang, ginlutos sang Morocco ang World No.2 nga Belgium sa skor nga 2-0.
Yari tanan ang natipon nga puntos sang kada team sa Group F:
MOROCCO – 2 wins, 1 draw, 0 loss – 7 points
CROATIA – 1 win, 2 draws, 0 loss – 5 points
BELGIUM – 1 win, 1 draw, 1 loss – 4 points
CANADA – 0 win, 0 draw, 3 losses – 0 point
