ILOILO CITY – Nagpanindugan si Negros Oriental Representative Arnolfo Teves Jr. nga indi ini magbalik sa Pilipinas bangud sa kahadlok sa iya seguridad kag nagpanawagan sa otoridad sang “fairness” kag lantawon ang tanan nga anggulo sa pagpatay kay Negros Oriental Governor Roel Degamo.
Si Teves ang gina-link sa pagpatay sa gobernador kag sa walo ka iban pa.
Suno sa mamalidha, nag-request ini nga magtambong via zoom sa panel hearing sang House committee on ethics and privileges. Apang nagpanindugan ang panel nga kinahanglan niya nga magtambong physically agud nga mapaathag kun ngaa nga wala pa siya nakabalik apisar nga natapos na ang iya travel authority.
Pahayag niya, pareho lang sila nga biktima sang pamilya Degamo kag ginagamit lamang siya sang iban para sa political image.
Wala na ginpaathag dugang sang mamalidha ang ginapahayag niya nga “script” nga amat-amat nga nagagwa.
Sa script suno sa iya, lakip na diri ang pagpatay kay Degamo agud nga matum-ok siya.
Gin-akusaran pa sini ang iban nga tawo nga ginahimo lamang siya nga sacrificial lamb.
Nagpanawagan man ini sa presidente nga tuman na ang ginahimo sa iya sang gobyerno, ginatum-ok siya, kag ginadaug-daog.
Suno sa iya, antes pa man natabo ang pagpatay kay Degamo, may operasyon na nga ginpatigayon batuk sa iya.
May mga impormasyon ini nga nakuha nga ang order ang nagikan sa palasyo sang Malacañang.
Apang suno kay Teves, ang presidente ang gingamit lamang kag indi matuod nga si Presidente Ferdinand Marcos, Jr. ang nagmandu sini.
Gin-kwestiyon Negros Oriental Representative Arnolfo Teves Jr. ang panawagan ni Speaker Martin Romualdez sa iya nga magpauli.
Suno sa iya, may salig siya kay Romualdez apang paano magarantiya ang iya seguridad kung una pa lamang, ginkuhaan na siya sang armas kag bodyguard.
Dugang pa niya, mangin si Degamo ang napatay apisar nga tuman na kadamo sang military kag police personnel ang nagabantay sa iya.
Pahayag niya, gusto nagid niya nga magpauli apang indi niya mahimo nga masakripisyo ang iya kabuhi.
Ginpahayag man ni Negros Oriental Representative Arnolfo Teves Jr. nga nagpakig-angut na siya kay Justice Secretary Jesus Crispin Remulla nga ginkabig niya nga isa ka abyan.
Suno sa iya, wala sang problema sa iya kun lakip siya sa mga suspek nga imbestigaran apang pahayag niya, dapat man nga tan-awon ang tanan nga anggulo.
Una na nga gin-dismiss ang isa sa mga complaint nga illegal possession of firearms and unlawful possession of explosives nga gin-file batuk kay Teves bangud sa kakulang sang ebidensya.
Ang duha sa mga suspek nga sanday Joric Labrador kag Benjie Rodriguez nga lunsay mga anay soldado ang nagbuyagyag nga isa ka certain “Cong Teves” ang nagmandu sa pagpatay kay Degamo.
Una na nga ginpanginwala ni Teves nga may kahilbatanan sila sang iya utod nga si Henry sa kamatayon ni Degamo.
Kahapon, apat pa ka mga suspek ang nag-surrender sa otoridad
