Ginpasalamatan ni former Philippine National Police (PNP) chief Camilo Pancratius Cascolan si President Ferdinand ‘Bongbong’ Marcos sa pag-appoint sa iya bilang undersecretary sang Department of Health (DOH).
Suno kay Cascolan, indi siya doktor apang indi man kinahanglan nga mangin doktor gid agud nga ma-assign sa amo nga ahensya.
Nagapati man si Cascolan nga daku ang iya nga mabulig sa administration and management sang amo nga department sa gobyerno.
Ang importante suno sa iya, mapatuman ang mga programa sang gobyerno sa idalom sang direktiba sang officer in charge secretary sang amo nga ahensya.
Ginpahayag man sini nga maka-amot man siya sang mga ideya may kaangtanan sa COVID-19 protocols kag sa iban pa nga mga isyu may kaangtanan sa health.
“First, thank you Pres. BBM for the trust. I’m not a doctor but one doesn’t need to be a doctor to be assigned in DOH. Administration and management will always be a part of every department in government and I believe I will be of big help in this area. What’s important is the government’s program is implemented with the directive of the OIC Sec. DOH,” kabahin sang pahayag ni Cascolan.
Kun balikan, nangin chief sang PNP si Cascolan sang tion ni anay Presidente Rodrigo Duterte sang Septyembre 2020, apang naghalin man ini sa posisyon pagkatapos sang duha ka bulan matapos nga nalab-ot sini ang mandatory nga edad para sa retirement.
Tumandok ini sang Baguio City kag isa sa mga utok sa likod sang Oplan Tokhang. Isa man siya sa mga generals nga gina-konsiderar nga kabahin sang trusted circle ni Duterte nga ginatawag nga “Davao boys.”
Nagserbe man ini sadto bilang hepe sang Balasan Municipal Police Station sa Iloilo kag nangin deputy regional director for operations sang Police Regional Office (PRO) 6.
Sang 2021, ginhingadlan siya bilang undersecretary sang Office of the President.
Indi maathag tubtub subong kun paano nga ang credentials sini sa pagpatuman sang layi ang makabulig sa iya sa iya bag-o nga katungdanan sa DOH.
Isa sa maathag amo nga wala sa gihapon sang permanente nga tiglikom ang DOH apisar apat ka bulan na ang nagligad halin sang nagpungko si Marcos bilang presidente sang Pilipinas.
KRITISISMO
Kun nalipay si Cascolan sa pag-appoint sa iya ni Marcos bilang undersecretary sang DOH, baliskad naman ang nabatyagan sang grupo sang health workers sa pungsod.
Suno sa Alliance of Health Workers, ang pag-appoint kay Cascolan sa amo nga posisyon ang nagapakita lang nga kulang gid sang concern si Marcos sa kabuhi, ikaayong lawas, safety kag welfare sang health workers kag sang bilog nga pungsod.
Suno pa sa grupo, insulto ini sa health experts nga amo kuntani ang most qualified nga magdumala kag magpadalagan sang affairs sa DOH.
“AHW believes that PBBM’s appointment of Cascolan is a clear manifestation of the President’s extreme lack of concern for the lives, health, safety and welfare of the health workers and the entire Filipino nation. Cascolan’s appointment is a huge insult to our health experts who are most qualified to administer and run the affairs of the DOH,” pahayag sang grupo sa isa ka separate statement.
Gin-cite man sang grupo nga nangin utok si Cascolan sang Oplan Tokhang sa Duterte administration. Ang kinahanglan kuntani nga undersecretary suno sa grupo amo ang may yara sang malimpyo nga track record, indi red-tagger, kag may kamot nga wala nabahidan sang dugo sa blood war sa pungsod.
Ginhingyo man sang grupo sa presidente sang Pilipinas nga magbutang na sang bag-o nga tiglikom sa DOH. ##
