Ginhatagan sang lima ka adlaw sang Office of the Ombudsman sanday Buenavista, Guimaras Mayor Samuel Gumarin kag Vice Mayor Cyril Beltran agud sabton ang indi paghatag sang mga opisyal sang year-end bonus kag cash gift sang pila ka empleyado sang munisipyo.
Sa interview sang Bombo Radyo kay Former Buenavista, Guimaras Mayor Eugene Reyes, iya ginpahayag nga madugay na sila nga naga-demand sang sabat halin kay Beltran kag Gumarin bangud 2022 pa sang wala mahatag ang cash gifts sang pila ka naghalin na nga empleyado sang Buenavista Local Government Unit (LGU).
Suno kay Reyes, siyam sila nga mga empleyado ang wala nakabaton sang ila benefits apisar sang ila hingyo.
Ginpahayag man sini nga bisan ang municipal accountant kag municipal budget sang banwa ang nagapabutyag nga nagakadapat ihatag ang ila benepisyo.
Nagadalagan naman sa balor nga P70 to P80,000 ang sarang nga makuha ni Reyes sa nasambit nga cash gift kag bonus.
Gin-athag man ni Reyes nga antes nagpaguwa ang Office of the Ombudsman, nakapadala siya sang sulat sa duha ka mga opisyal, apang si Vice Mayor Beltran lang ang nagsabat.
Para kay Reyes, ginpasalig kag ginpabungol-bungolan lang sila kon sa diin, ginhangkat pa nga magpasaka sang kaso, rason man nga nagpasaka siya sang kaso nga Dereliction of duty.
Nagalaum man ang natungdan nga masabat nila ang indi paghatag sang cash gifts ukon benefits sa mga anay empleyado sang si Reyes pa ang nagapungko bilang alkalde.
Sa ngalan sang patas nga pagwaragwag, bukas ang Bombo Radyo Iloilo kay Vice Mayor Beltran kag Mayor Gumarin agud nga makasabat sa amo nga complaint.
