Ginabulubanta nga yara na sa 80% sang stalls sang Iloilo Terminal Public Market ang okupado base sa record sang Local Economic Enterprise Office (LEEO).
Sa interview sang Bombo Radyo kay Maricel Mabaquiao, head sang LEEO, iya ginpahayag nga nagapadayun pa tubtob subong ang pagbatun sang ila opisina sang application forms halin sa mga vendor nga luyag magkuha sang pwesto sa sulod sang merkado nga magapaidalom man sa business plan evaluation.
Suno sa iya, may ara man sang nakasumiter na sang ila application forms, apang maga-agi pa ang mga ini sa mga proseso antes maaprubahan.
Ginpakigbahin man ni Mabaquiao nga gin-una gid nga hatagan sang pwesto ang mga orihinal kag transient vendors, samtang naplastar naman ang mga bolantero sa ikatlo nga panalgan sang nasambit nga merkado.
Dugang pa niya nga gina-target sang LEEO nga antes magtakop ang bulan sang Setyembre, mas matutukan nila ang sitwasyon sa iban pa nga mga merkado sa siudad agud ma-organisar sang mas maayo kag mahatagan pa sang pwesto ang mga nagakinahanglan kag kwalipikado nga mga vendors.
