ILOILO CITY – Ginapatukod subong ang ₱7.5 million feed mill project sang Bureau of Animal Industry sa idalom sang Department of Agriculture sa Brgy. Igdalaquit, Sibalom, Antique,.
Suno kay Albert G. Estoya, municipal agriculturist sa Sibalom, Antique, dako ini nga bulig agud indi na mangin mabudlay para sa mga manugsagod sang sapat ang pagbakal sang malahalon nga commercial feeds nga nagabuhin sa ila kita.
Ang nasambit nga feed mill ang ginalauman nga maga-operate sa Pebrero 2021 nga ginapagana sang diesel kag sarang nga makagaling sang walo ka tonelada sang mais kada adlaw.
Ang feed mill project ang ginalakipan sang pagpatukod sang warehouse, provision kag installation sang pneumatic hammer mill, horizontal feed mixer, micro mixer, storage bin, flat conveyor, bucket elevator, weighing bucket, sack sealer, weighing scale, solar perimeter kag warehouse lights.
“We have included in our next year’s budget the funds for the procurement of yellow corn from the local farmers of Sibalom and San Remigio. With this feed mill project, we can reduce the price of animal feeds by 30 percent lower than the price of commercial feeds being sold by private traders at ₱1,300 to ₱1,500 per sack,” pahayag ni Estoya.
Ginpasalamatan man ni Estoya ang Department of Agriculture bangud sa mapuslanon nga proyekto.
“Ginapasalamatan ko guid ang DA, kag BAI sa sini nga mga proyekto. Apang ginapangayo ko lang daad nga mahatagan kami sang 10-wheeler hauling truck para magamit sa pagdala sang amon baboy sa Iloilo kay naga bayad kami sang renta nga ₱30,000 kada trip. If DA could provide us with the hauling truck and operating capital, maka siguro guid kami nga sa winning side ang mga mangunguma kay masiguro nga mataas ang presyo sang baboy kag madugangan ang kita nila,” suno kay Estoya.
