Wala pa sang pinal nga desisyon ang gobyerno may kaangtanan sa liwat nga pagbukas sang klase sa mga buluthuan sa Pilipinas.
Ini matapos nga gin-athag sang National Economic and Development Authority nga ginakonsiderar palang ang nangin pahayag ni Presidential Spokesman Harry Roque nga sa Setyembre pa liwat nga magabukas ang klase sa mga buluthuan sa pungsod kag indi pa ini ang pinal nga desisyon.
Suno kay Karl Chua, direktor sang National Economic and Development Authority, ginahulat pa nila ang pahayag sang Department of Education kag sang Inter-Agency Task Force for the Management of Emerging Infectious Disease nga mangin pinal na ini nga desisyon.
Nahibaluan nga nakasaad sa Republic Act 7797 nga mahimo lang nga magsugod ang klase sa mga buluthuan humalin sa ika-labing una nga lunes sang Hunyo tubtob sa ulihi nga adlaw sang Agosto.
Suno naman kay Department of Education Secretary Leonor Briones, igapresentar nila ang ila rekomendasyon sa ika-labing una nga semana sang Mayo.
Magapresentar man sang ila rekomendasyon sa IATF ang Commission on Higher Education may kaangtanan sa pagbukas sang klase.
Madumduman nga una na nga ginpahayag sang Department of Education nga ginatan-aw nila ang posibilidad nga magsugod ang klase sa bulan sang Agosto.
Samtang naghatag naman sang suhestiyon ang grupo sang mga eksperto gikan sa University of the Philippines nga i-suspend ang klase lakip na ang anuman nga physical interaction tubtob Disyembre agud malikawan ang paglapta sang Covid-19.
