Pagkumpiskar sang sidecar sang tricycle drivers nga may sulit-sulit na nga violations, ginaduso sang TTMO

Ginaduso sang Traffic and Transportation Management Office (TTMO) nga amyendaran ang ordinansa sa syudad sang Iloilo agud nga madagdagan sang mas mabug-at nga penalidad ang mga driver sang tricycle nga nagapabungol lang kag nagabalik-liwat sa pagbyahe apisar makapila na mapinahan.

Sa interview sang Bombo Radyo kay Retired Police Colonel Uldarico Garbanzos, head sang TTMO, iya ginpahayag nga may illegal tricycle operators sa syudad nga lima ka beses ukon masobra na nga nagakadakpan, apang nagabayad lang sang penalidad kag nagabalik liwat sa pagbyahe.

Nangin siklo na ang pagpasaway suno kay Garbanzos, gani nga ginaduso sang talatapan nga may bag-uhon sa pila ka section sang City Regulation Ordinance No. 2024-116 ukon ang Tricycle Franchising and Regulation Ordinance.

Partikular nga ginahingyo sang opisina nga kun duha tubtub tatlo ka beses na nga madakpan ang colorum nga tricycle, motorcycle unit na lang ang ibalik sa tag-iya kag kumpiskaron na sang Iloilo City Government ang sidecar.

Ginklaro ni Garbanzos nga proposal pa lamang ini kag gina-check pa nila sa City Legal Office ang ano man nga legal nga implikasyon pananglitan ipatuman na sa syudad.

Halin sang nagligad nga tuig, naka-rekord na ang opisina sang 1,000 tubtub 1,500 nga nagkadalakpan kun sa diin involved ang unauthorized tricycles kag e-trikes lakip na ang units nga naga-operate sa mga mayor nga dalanon kun sa diin ginadumilian sila.

Sa rekord sang opisina, kadam-an sa violators ang naga-operate sa Iloilo City Proper.

Nahibaluan nga sa ordinansa subong sa syudad, nakasaad nga required ang mga driver kag operators sang tricycle nga mag-operate lamang sa sulod sang designated nga ruta sandig sa kun ano ang nakabutang sa ila nga prangkisa.

Sa section 9 sang ordinansa, nakabutang nga P1,000 ang bayad sa first offense sa drivers nga naga-operate sa highways nga wala sang awtorisasyon kag nagapasakay sang pasahero kag karga nga lapaw na sa ila franchise route.

Ang naga-operate nga wala sang valid franchise kag Motorized Tricycle Operators Permit ang nagapangatubang man sa amo nga minimum fine; P1,200 sa second offense; kag mas nagataas na sa masunod nga offenses.