ILOILO CITY – Mas makapaayo kun butangan sang kudal ang mga tanom sa palibot sang syudad sang Iloilo agud nga indi matapakan sa tion nga magdagsa ang tawo ilabi na kun may yara sang aktibidad.
Ini ang kasunod sang ginpatigayon nga Opening Salvo kahapon sa diin ang mga tanom nga yara sa center island ang nagkalahapay kag nadunot matapos ginlasak sang mga tumalan-aw.
Sa interview sang Bombo Radyo kay Iloilo City Councilor Ely Estante, Chairman sang Committee on Environment and Natural Resources Office, iya ginpahayag nga mas makapaayo kun pahamtangan sang protector ang mga tanum nga kabahin sang beautification program.
Suno kay Estante, gingastuhan sang Iloilo City Government and pagpatahum sa palibot sang syudad rason nga dapat lamang nga atipanon ini sang maayo.
May kaangtanan naman sa pagpatuman sang Anti-Littering Ordinance, ginpahayag ni Estante nga nagakadapat man ini nga ipatuman agud nga mapabilin ang katinlo sa palibot.
Samtang, ginpahayag naman sang pinuno sang City Environment and Natural Resources Office nga si Engr. Noel Hechanova nga pabor siya nga pahamtangan sang kudal ang mga tanum agud nga indi ini pagtapakon ilabi na sa highlight sang Dinagyang Festival 2020.
Suno kay Hechanova, may yara man sang mga green guard nga nagabantay lakip na sa pagpatuman sang Anti-Littering Ordinance apang kun nagadinaguso ang tawo, indi na nila ini masapar sa pagpangsaway.
May kaangtanan naman sa istrikto nga pagpatuman sang Anti-Littering Ordinance, ginpahayag ni Hechanova nga nakadepende ini sa Local Chief Executive.
Sa subong, isa lang ang mapromisa sang natungdan kag ini amo nga dakpon ang mga violator sa nasambit nga ordinansa.
