ILOILO – Pagpalangga sa pamilya ang pinakasentro sang pagsaulog sang Christmas Day ukon paskwa sa pihak sang ginapangatubang nga problema sa kabuhi.
Sa Good Morning Philippines program, ginpakigbahin ni Jhen Umahag Divinagracia ang istorya sang iya pamilya nga sa pihak sang kasubo, nagapabilin nga mabakod agud nga malampuwasan ang pagtilaw.
Suno kay Divinagracia, ang pagsaulog sang ila pamilya sang paskwa subong nga tuig ang napun-an sang kasubo matapos nga nagtaliwan ang iya utod nga si Leona nga isa ka Overseas Filipino Worker.
Ginpahayag ni Divinagracia nga dalaga pa lang ang iya utod sang nagpadulong sa luwas sang pungsod agud nga magtrabaho tubtub nga nag-untat sang nagpamana kag naka-angkon sang kabataan.
Liwat nga nagbalik sa pagtrabaho sa luwas sang pungsod ang iya utod nga si Leona matapos ang pagbulagay nila sang iya bana.
Bilang mag-utod, indi man malikawan nga may yara sila sang indi pag-intindihanay ni Leona rason nga sa malawig nga tion, wala sila nagsapakanay bisan pinaagi man lang sa social media.
Ulihi na lang niya nahibalu-an nga may yara sang cervical cancer ang iya utod nga sa malawig nga tion, wala gid nagpanugid tuhoy sa iya balatian.
Bangud sa nagalala nga medical condition, nagpauli ang iya utod kag nagpaidalom sa treatment tubtub nga ginbawi-an sang kabuhi kag natalana nga ilubong sa Disyembre 30.
Masakit suno sa natungdan nga sa malawig nga tion, wala sila nagsapakanay sang iya utod apang ang importante suno sa iya amo nga naka-angkon sila sang tion nga ipabutyag ang pagpalangga sa kada isa.
