Padasigon sang Department of Transportation ang pag-release sang P2.5 billion nga fuel subsidies para sa tricycle drivers subong nga tuig.
Suno kay Commission on Appointments minority leader Sen. Cayetano, nagkit-anay sila sang Cabinet agud nga magsugtanay nga i-expedite ang pagpanagtag sang fuel subsidies sa linibo ka tricycle drivers sa bilog nga pungsod.
Nag-ugyon man si Transportation Secretary Jaime Bautista nga pwede mahimo sang local government units ang distribusyon bangud may yara na ini sang eksperyensya kag kapasidad sa paghatag sang assistance.
Matandaan nga sa confirmation hearing ni Bautista, ginbuyagyag ni Cayetano nga 6,000 tricycle drivers gid lamang ang nakabaton sang subsidy.
Malayo ini nga figure sa 600,000 tricycle drivers nga amo suno sa Department of the Interior and Local Government ang kuwalipikado nga makabaton sang ayuda.
Ginrason naman ni Bautista nga na-delay ang subsidiya bangud indi available ang master lists sang registered tricycle drivers sa pila ka local government units.
Suno naman kay Cayetano, mahimo man mapatawag ang tricycle operators and drivers associations ukon TODAs agud magbulig mismo sa distribution sang subsidy sa ila nasakpan nga mga driver.
Ginpahayag pa sang senador nga ini nga transport groups ang nalakip sa most organized groups sa pungsod kag may yara sang kumpleto nga lista sang ila nga mga myembro.
