ILOILO CITY – Ginpahayag ni Philippine Ambassador to the United States Jose Manuel Romualdez nga may yara na sang seryoso nga diskusyon sa tunga sang Pilipinas kag sang Estados Unidos agud nga magpatigayon sang joint patrols sa West Philippine Sea.
Ini ang pahayag ni Romualdez kadungan sang pagtambong sini sa isa ka event nga gin-organize sang Makati Business Club kun sa diin, nangin dinapit nga bisita si United States Ambassador MaryKay Carlson.
Wala na naghatag pa sang dugang nga detalye si Romualdez.
Apang suno sa iya, ini ang kabahin sang madamo nga kasugtanan sang duha ka pungsod.
Suno naman kay Carlson, ang combined maritime activities sang duha ka pungsod ang tuman ka importante agud nga mapabaskog pa ang seguridad sang pungsod.
Dugang pa niya, himuon sang Estados Unidos ang tanan agud nga mabuligan ang mga manugpangisda sa Pilipinas.
Padayon man ang ila nga koordinasyon sa Philippine Coast Guard agud nga matigayon ang ginaplano nga mga aktibidad.
Suno naman kay former Philippine Ambassador Jose Cuisia, ang joint patrols ang kinahanglan agud nga mabatuan ang claims sang China sa West Philippine Sea.
