ILOILO CITY- Ginpaidalom na sa strict home quarantine ang walo ka miembro sang pamilya sang mag live-in partner nga Locally Stranded Individuals nga nagpositibo sa covid-19 nga nagpauli sa Calumpang, Molo, Iloilo City gikan sa Cebu City.
Sa interview sang Bombo Radyo kay Punong Barangay Roberto Niño sang nasambit nga barangay, iya ginpahayag nga matapos ginpaidalom sa facility quarantine sanday patient # 191 kag patient # 195, gilayon man nga ginbantayan ang puluy-an sang duha sa diin gilayon nga gin-disinfect ang ila balay kag wala na gintugutan nga makagwa ang mga miembro sang pamilya.
Ginpanginwala naman ni Niño ang naglapta nga impormasyon nga naggwa kag nagmahjong pa ang nasambit nga mga indibidwal samtang ginapaidalom sa strict home quarantine.
Nahibaluan nga una nga nag-negatibo sa rapid test ang duha ka pasyente apang nagpositibo sa ginpatigayon nga real-time polymerase chain reaction (RT-PCR) test.
