Ginapadasig na sang South Korea ang detailed engineering design sang 32.47 kilometer Panay-Guimaras-Negros Island Bridges Project.
Suno kay Ambassador of the Republic of Korea to the Philippines Lee Sang-hwa, nagpirma ang Department of Public Works and Highways (DPWH) sang P2.67 billion contract sa grupo sang Korean firms para sa detailed engineering design sang nasambit nga proyekto.
Nagalaom ang ambassador nga pinaagi sa “Build, Better, More” program ni President Ferdinand Marcos Jr., mas mangin mamag-an ang kabuhi sang mga pumuluyo kag maangkon ang economic stability sa nasambit nga mga lugar.
Ginpahayag sang natungdan nga ang gasto sa engineering services ang ginpondohan pinaagi sa loan sa Export-Import Bank of Korea – ang official export credit agency sang South Korea halin sa official development assistance sang Economic Development Cooperation Fund.
Ang detailed engineering design ang ginalauman nga matapos subong nga tuig kag ang civil works naman ang umpisahan sa masunod nga tuig tubtob sa 2030.
Ang Panay-Guimaras Islands Bridge nga may kalabaon nga 13-kilometer ang nagabalor sang P57.702 billion.
Samtang ang 19.47 kilometer Guimaras-Negros Islands bridge naman ang nagabalor sang P109.76 billion.
Sa tion nga matapos ang proyekto, ginalauman nga mas mapadasig na ang byahe halin sa Panay Island tubtob sa Negros Island sa sulod lang sang masobra isa ka oras halin sa apat ka oras nga byahe sa ferries kag roll-on roll off vessel.
